(( ورق البسكوت )) من ديوان كشف الغطا
- حبيبتي بتلعب لسه بأوراق البسكوت
- .
- زي فراشه رقيقه ف أحضان الملكوت
- .
- عملت سفينتها اللي بتلمع ف خيوط الشمس
- .
- عملت خاتمين وغويشه و (ما شاء الله)
- كانوا شكل الشبكه اللي ف ايدها
- كانوا لون الدم اللي ملون حبات التوت
- .
- حبيبتي بتفتح بايديها الشباك في الفجر
- وبترمي النوم اللي معشش ف عيونها السمر
- بتبص على الرايح والجي
- وبتنشر ف هموم الحي
- وانا تحت الشباك بردان
- حامل هم المشيان
- لما اوصل للبيت
- ما اعرفش ح آ نام
- وللا ح اموت
- واما الصبح الأبيض قام
- عدى على بلادنا
- ع البيت اللي محمل احزانه
- فوق كتف الدكان
- كان وقت القوم
- فمشيت ..
- بصيت ع الشباك الأخضر وبشاور
- بصتلي
- ففتحت شفايفي عشان أضحك
-
- ضحكتلي
-
- فبكيت
ليست هناك تعليقات:
إرسال تعليق